Poet
mere zehn-o-dil men fikr-o-fan men tha
niim ka vo peḌ jo angan men tha
jis pe likkha tha mira nam-o-nasab
qaid main miTTi ke us bartan men tha
ek vo har dasht men sairab tha
ek main pyasa har ik savan men tha
dekh kar bhi jo na dekha ja saka
aks-ara vo har ik darpan men tha
kah na paaya jaane kyuun ik harf bhi
jaane kya us aadmi ke man men tha
jis ko koi naam de sakta nahin
vo bulava us para.e-pan men tha
andhiyan sab kuchh uḌa kar le ga.iin
peḌ par patta na phal daman men tha
ja-ba-ja qaus-e-quzah ki chhuT thi
ik tilism abad pairahan men tha
chhin kar ‘shadab’ koi le gaya
ik anokha sukh jo ghar-angan men tha
Leave a Reply