ankhon ke charaghon men ujale na rahenge
aa jaao ki phir dekhne vaale na rahenge
ja shauq se lekin palaT aane ke liye ja
ham der talak ḳhud ko sambhale na rahenge
ai zauq-e-safar ḳhair ho nazdik hai manzil
sab kahte hain ab paanv men chhale na rahenge
jin nalon ki ho ja.egi ta-dost rasa.i
vo sanehe ban ja.enge naale na rahenge
main tauba to kar luun magar ik baat hai vaa.iz
kya aaj se gardish men piyale na rahenge
kyon zulmat-e-gham se ho ‘ḳhumar’ itne pareshan
badal ye hamesha hi to kaale na rahenge
Leave a Reply