nai aadmi pasand na us ko ḳhuda pasand
hai a.ine men qaid mira a.ina pasand
vo chaar din bhi ham se nibahi nahin ga.i
vo mo.atadil-mizaj tha main intiha-pasand
vo ḳhud-fareb shaḳhs tha patthar shanas tha
aaya na us ko koi bhi apne siva pasand
jab koi farq shahid-o-mash.hud men nahin
kaise kare kisi ko koi dusra pasand
puchhe hai ham ne kaahe kiya kufr iḳhtiyar
ghaflat pasand hai na hamen aasra pasand
kholi hai jab se aankh kabhi so nahin sake
kyunki hamen hai ḳhvab men bhi jagna pasand
main bhi ye barg-e-sabz bhi maahi bhi murgh bhi
bandhe hue hain maut ne saare hava pasand
ḳharij ki baat aankh se aage ki thi magar
sab qaidiyon ko rauzan-e-divar tha pasand
‘akash’ ek shaḳhs hai auron se muḳhtalif
pahli nazar men hi tumhen aa ja.ega pasand
Leave a Reply