baat ruk ruk kar baḌhi phir hichkiyon men aa ga.i
phone par jo ho na paa.i chiTThiyon men aa ga.i
sub.h do ḳhamoshiyon ko chaa.e piite dekh kar
gunguni si dhuup utri pyaliyon men aa ga.i
train ojhal ho ga.i ik haath hilta rah gaya
vaqt ruḳhsat ki udasi chuḌiyon men aa ga.i
adh-khili rakhi rahi yuun hi vo novel god men
uTh ke pannon se kahani siskiyon men aa ga.i
chaar din hone ko aa.e kaal ik aaya nahin
chuppi mobile ki ab bechainiyon men aa ga.i
baaT jo hai thak ga.i chhat par khaḌi jab dopahar
shaam ki chadar lapeTe khiḌkiyon men aa ga.i
raat ne yadon ki machis se nikali tiliyan
aur ik cigarette sulgi ungliyon men aa ga.i
Leave a Reply