Usne Mai Pi Ke Sar-E-Bazm Jo Saghar Ulta

us ne mai pi ke sar-e-bazm jo saghar ulta

varaq-e-anjuman-e-dahr sarasar ulta

dekhne vaale ko duniya hai sarapa tasvir

go hai aine men aks rukh-e-dilbar ulta

kar diya aa ke chaman ko tah-o-bala kis ne

koi sidha hai yahan koi gul-e-tar ulta

naaz se mujh ko sar-e-bazm jo saaqi ne diya

haath tharrae kuchh is tarah ki saghar ulta

ai khuda kya yuun hi aati hai kisi dost ki yaad

aa gaya munh ko kaleja dil-e-muztar ulta

dad-khvahan-e-mohabbat ka ye amboh-e-kasir

dil mira dekh ke hangama-e-mahshar ulta

jis pe ki baith ke vaaiz ne mazammat mai ki

majlis-e-vaz men rindon ne vo mimbar ulta

ya zamane men mohabbat ke fasane hain ghalat

ya mira naqsh-e-vafa hai mire dil par ulta

ta-kuja ai dil-e-bimar ye rahat-talabi

umr bhar jab se bichha phir na ye bistar ulta

uth gai aaj zamane se bisat-e-ulfat

bistar-e-marg mira us ne ye kah kar ulta

ashk-bari-e-shab-e-hijr ka kya haal likhun

dida-e-tar ne ‘nazar’ ek samundar ulta

Leave a Comment