koi aa kar nahin jaata dilon ke ashiyanon se
riha.i ka koi rasta nahin in qaid-ḳhanon se
machhere kashtiyon men baiTh kar ke ga rahe hain giit
hava.en muskura kar mil rahi hain badbanon se
zamin valon ne jab se asman ki or dekha hai
parinde ḳhauf khane lag ga.e unchi uḌanon se
ye sukhe zaḳhm hain ya rang hain tasvir maazi ke
mujhe guzre zamane yaad aa.e in nishanon se
hamen apni laḌa.i is zamin par ḳhud hi laḌni hai
farishte to nahin aane yahan par asmanon se
tumhara dil yahan par kho gaya to kaisi hairat hai
bareilly men to jhumke tak nikal jaate hain kanon se
Leave a Reply