Poet
koi dekhe to ye andaz satane vaala
mujh se ghafil hai mire ḳhvab men aane vaala
ba.az auqat ye dekha hai tiri galiyon men
rasta bhuul gaya raah batane vaala
dars-e-ibrat mira anjam hai duniya ke liye
ab tiri baton men koi nahin aane vaala
gumrahi ka mujhe ehsas dila deta hai
ba.az auqat koi Thokaren khane vaala
miThi miThi si mire dil men kasak chhoḌ gaya
ḳhalvat-e-zehn men chupke se dar aane vaala
ghar men ye jashn-e-charaghan ka saman kya ma.ani
is ḳharabe men bhala kaun hai aane vaala
apne a.amal-o-aqa.ed ko parakhte rahiye
ab koi aur payambar nahin aane vaala
kya kahun kaun hai mauzu-e-suḳhan ai ‘tahir’
ek kirdar tarasha hai fasane vaala
Leave a Reply