jaana to bahut duur hai mahtab se aage
baḌhte hi nahin paanv tire ḳhvab se aage
kuchh aur hasin moḌ the rudad-e-safar men
likkha na magar kuchh bhi tire baab se aage
tahzib ki zanjir se uljha raha main bhi
tu bhi na baḌha jism ke adab se aage
moti ke ḳhazane bhi tah-e-ab chhupe the
nikla na koi ḳhatra-e-girdab se aage
dekho to kabhi dasht bhi abad hai kaisa
niklo to zara ḳhitta-e-shadab se aage
bichhḌa to nahin koi tumhara bhi safar men
kyuun bhage chale jaate ho betab se aage
duniya ka chalan dekh ke lagta to yahi hai
ab kuchh bhi nahin alam-e-asbab se aage
Leave a Reply