Poet
junun barsa.e patthar asman ne mazra-e-jan par
jafa-e-pir sabqat le ga.i bedad-e-tiflan par
lagaya itr jab ham ne lab-e-rangin-e-janan par
to goya tel chhiḌka atish-e-la.al-e-badaḳhshan par
nahin ye mo.ajiza mauquf kuchh musi-e-imran par
pyale hain yad-e-baiza kaf-e-pur-nur-e-mastan par
kabhi chalti nahin bad-e-bahari apne gulshan men
vo bulbul huun ki varafta huun main gul-ha-e-hirman par
bayaz-e-ku-e-janan bulbul-e-shiraz gar dekhe
sifat us bostan ki likkhe auraq-e-gulistan par
kiya qatl us ne mujh ko main ne ki qatil ki ara.ish
jamaya ḳhuun ka lakha lab-e-shamshir-e-burran par
pas-e-divar taḌpoge kahan tak shauq kahta hai
kamand-e-ah se chaḌh jaao bam-e-qasr-e-janan par
tasavvur bandh gaya vahshat men kis ke ru-e-raushan ka
ki aalam vadi-e-aiman ka hai apne bayaban par
hamesha sabz rahta hai gulistan jud-o-baḳhshish ka
kabhi bad-e-ḳhizan chalte na dekhi bagh-e-ehsan par
hua jaame se bahar kis qadar shauq-e-shahadat hai
paḌi jis dam nazar qatil tiri shamshir-e-uryan par
ye kis mehr-e-sip.har-e-husn ne rakkhe qadam apne
guman-e-mahr hai har zarra-e-ḳhak-e-shahidan par
tumhara muskurana janta huun jaan kho.ega
karegi ek din barq-e-tabassum ḳhirman-e-jan par
nahin bas aj-kal sultan iqlim-e-shahadat men
hai apne naam ka sikka zar-e-ganj-e-shahidan par
miTa diin teziyan ai zo.af tu ne dasht-e-vahshat men
paḌa hai surat-e-tar-e-gareban chak-e-daman par
bana kar til ruḳh-e-raushan pe vo shoḳhi se kahte hain
ye kajal ham ne paara hai charagh-e-mah-e-taban par
unhen parva nahin hai kuchh na ho gar baaḌ ka Dora
ki Dore Dalte hain yaar ki ham tegh-e-uryan par
dahan ho us ke paida aur zaban us ki huvaida ho
zaban-e-zaḳhm ko rakh duun zaban-e-tegh-e-burran par
paḌa aks-e-shafaq to naaz se kahne laga qatil
chaḌha sone ka paani gumbad-e-qabr-e-shahidan par
hamare yaar ne kiin chhup ke baten pyaar ki ham se
lagaya aaj poshida ye marham zaḳhm-e-pinhan par
agar raushan karun us ko charagh-e-dagh-e-sauda se
dhuan zanjir ban jaa.e sar-e-sham-e-shabistan par
hua dhoka jo ham ko tegh-e-ḳhun-alud qatil ka
gala ragḌa kiye ham mauja-e-ḳhun-e-shahidan par
mazamin us ke jab bandhe to bandish saaf di ham ne
jila kar di hamesha gauhar-e-mazmun-e-dandan par
pas-e-murdan ‘qalaq’ ehsan kiya ye na-tavani ne
subuk mera janaza ho gaya dosh-e-azizan par
Leave a Reply