ab ke baras dastur-e-sitam men kya kya baab izad hue
jo qatil the maqtul hue jo said the ab sayyad hue
pahle bhi ḳhizan men baagh ujde par yuun nahin jaise ab ke baras
saare buute patta patta ravish ravish barbad hue
pahle bhi tavaf-e-sham-e-vafa thi rasm mohabbat valon ki
ham tum se pahle bhi yahan ‘mansur’ hue ‘farhad’ hue
ik gul ke murjhane par kya gulshan men kohram macha
ik chehra kumhla jaane se kitne dil nashad hue
‘faiz’ na ham ‘yusuf’ na koi ‘yaqub’ jo ham ko yaad kare
apni kya kanan men rahe ya misr men ja abad hue