vafa-parast jahan-e-vafa ko le duube
ajiib baat hai bande khuda ko le duube
ye kaali kaali ghata jo barasne vaali hai
maza to jab hai kisi parsa ko le duube
safine ye to nahin hain jo hain kinaron par
safine vo the jo mauj-e-bala ko le duube
tamam ahl-e-nazara ki laaj rakh legi
vo ik nazar jo kisi ki ada ko le duube
ye kaise kaise riya-kar hain zamane men
saza ke naam se chaunke jaza ko le duube
baja hai shan-e-karimi ye hai sab ghurur magar
yahi ghurur to ahl-e-khata ko le duube
hamesha yaad hamin tak rahe hamare gham
vo dost kya jo kisi ham-nava ko le duube
Leave a Reply