Bahut Ukta Gaya Jab Shairi Se

bahut uktā gayā jab shā.irī se

lipaT kar ro paḌā maiñ zindagī se

abhī kuchh duur hai shamshān lekin

badan se raakh jhaḌtī hai abhī se

use bhī zabt kahnā Thiik hogā

bahut chīḳhā huuñ maiñ par ḳhāmushī se

bas us ke ba.ad hī mīThī nadī hai

kahā āvārgī ne tishnagī se

lagā hai sochne thoḌā tū munsif

mire haq meñ tumhārī pairvī se

mayassar ho ga.iiñ shakleñ hazāroñ

huā ye fā.eda be-chehragī se

suno vo daur bhī aa.egā ‘kāñhā’

takegā husn jab bechārgī se

Leave a Comment