Bekhud Dehlvi
dil men phir vasl ke arman chale aate hain
mere ruThe hue mehman chale aate hain
un ke aate hi hua hasrat-o-arman ka hujum
aaj mehman pe mehman chale aate hain
aap hon ham hon mai-e-nab ho tanha.i ho
dil men rah rah ke ye arman chale aate hain
us ne ye kah ke mujhe duur hi se rok diya
aap se jaan na pahchan chale aate hain
ruuTh baiThe hain magar chheḌ chali jaati hai
kabhi paigham kabhi paan chale aate hain
ye raha hazrat-e-‘beḳhud’ ka makan aao chalen
abhi dam bhar men miri jaan chale aate hain
Leave a Reply