abhi sardi poron ki pahchan ke mausam men hai
is se pahle ki barf mere darvaze ke aage divar ban jaae
tum qahve ki pyali se uthti mahakti bhaap ki tarah
meri pahchan kar lo
main abhi tak sabz huun
munh-band ilaichi ki tarah
main ne aaj tumhari yaad ke kabutar ko
apne zehn ke kabuk se azad kiya
to mujhe andar ki patavar dikhai di
chand puura hone se pahle tum ne mujhe chhua
aur baat puuri hone se pahle
tum ne baat khatm kar di
jankari ke bhi kitne dukh hote hain
bin kahe hi talkh baat samajh men aa jaati hai
achchhi baat ko dohrane ki sai
aur buri baat ko bhulane ki jidd-o-johd men
zindagi biit jaati hai
barf ki divar men
ab ke main bhi chunva di jaungi
ki mujhe aag se khelta dekh kar
danish-mandon ne yahi faisla kiya hai
main tumhare paas leti hui bhi
phuljadi ki tarah sulagti rahti huun
main tum se duur huun
tab bhi tum meri lapton se sulagte aur jhulaste rahte ho
samundar sirf chand ka kaha manta hai
sar-e-sham jab suraj aur meri ankhen surkh hon
to main chand ke bulave pe samundar ka kharosh dekhne chali jaati huun
aur mere pairon ke niche se ret nikal kar
mujhe be-zamin kar deti hai
pair be-zamin
aur sar be-asman
phansi par latke shakhs ki tarah ho ke bhi
yahi samajhti ho
ki munh-band ilaichi ki tarah abhi tak sabz ho
Leave a Reply