Saqib Lakhnavi
a.ina-e-ibrat hai mira dil bhi jigar bhi
ik dard ki tasvir idhar bhi hai udhar bhi
kya tum se shikayat mujhe qismat se gila hai
phirta hai muqaddar to palaTti hai nazar bhi
us ko bhi nikal ai dil-e-pur-dagh ke gulchin
kanTa hai mire pahlu-e-ḳhali men jigar bhi
bas nala-e-dil bas mujhe ummid nahin hai
munh dekhne valon men hai zalim ke asar bhi
milne se bhi un ke na-hove dil ko tasalli
vaslat ki masarrat bhi rahi sub.h ka Dar bhi
thame hain kaleja vo mire dil ko dukha ke
ik tiir ki tasir idhar bhi hai udhar bhi
hosh uḌte hain gum-gashtagi-e-ahl-e-adam se
is dasht-e-siyah-roz men anqa hai ḳhabar bhi
pis kar tire hathon ki hina jab se hua dil
ik ḳhuun ka chullu nazar aata hai jigar bhi
TukḌe tha kaleja mira ḳhud jaur-e-falak se
pahlu se ga.i chhan ke dil un ki nazar bhi
tanha.i-e-furqat men koi paas na Thahra
ruḳhsat hua aḳhir ko duaon se asar bhi
har ḳhauf se pahlu ka bachana nahin achchha
ai amn-talab hashr men kaam aa.ega Dar bhi
kya zaḳhm-e-dil ummid rakhe us se ki jis ne
dekha na kabhi chak-e-gareban-e-sahar bhi
rudad hai kya shahr-e-ḳhamoshan ki ilahi
is baab men ḳhamosh hain arbab-e-ḳhabar bhi
tasvir bana dijiye mujh ko kisi surat
le ja.iye pahlu se mira dil bhi jigar bhi
sad hadsa-e-dahr ki TuuTi na ajal se
jaati nahin un tak mire marne ki ḳhabar bhi
ye hukm-e-mohabbat hai ki dil us pe fida hai
‘saqib’ jise dekha na kabhi ek nazar bhi
Leave a Reply