Do ghaDi baiThe the Zulf-E-Ambarin Ki Chhanw Mein

do ghaḌi baiThe the zulf-e-ambarin ki chhanv men

chubh gaya kanTa dil-e-hasrat-zada ke paanv men

kam nahin hain jab ki shahron men bhi kuchh viraniyan

kis tavaqqo par koi ja.ega ab sahraon men

kachchi kaliyan pakki faslen sar chhupa.engi kahan

aag shahron ki lapak kar aa rahi hai gaanv men

zaḳhm-e-nazzara hain jismon ki barhana Tahniyan

aise patjhaḌ men khilenge phuul kya ashaon men

kya kahun tul-e-shab-e-gham pal men sadiyan Dhal ga.iin

vaqt yuun guzra ki jaise aable hon paanv men

zindagi men aisi kuchh tughyaniyan aati rahin

bah ga.iin hain umr bhar ki nekiyan dariyaon men

jalte mausam men koi farigh nazar aata nahin

Dubta jaata hai har ik peḌ apni chhanv men