dagh-dehlvi

Hath Nikle Apne Donon Kaam Ke

haath nikle apne donon kaam ke

dil ko thama un ka daman thaam ke

ghunt pi kar bada-e-gulfam ke

bose le leta huun khali jaam ke

raat din phirta hai kyuun ai charkh-e-pir

tere din hain rahat o aram ke

is nazakat ka bura ho bazm se

uthte hain vo dast-e-dushman thaam ke

chashm-e-mast-e-yar ki ik dhuum hai

aaj kal hain daur daur-e-jam ke

ya jigar men ya rahega dil men tiir

ye hi do goshe to hain aram ke

vo karen uzr-e-vafa achchhi kahi

mujh pe radde rakhte hain ilzam ke

jab qadam kaabe se rakkha su-e-dair

taar uljhe jama-e-ehram ke

khush hain vo daur-e-falak se aaj kal

din phire hain gardish-e-ayyam ke

aa gaya hai bhuul kar khat is taraf

vo to ashiq hain mire hamnam ke

haath se sayyad ke gir kar chhuri

kat gae halqe hamare daam ke

qasidon ke muntazir rahne lage

pad gae un ko maze paigham ke

kya kisi dargah men jaana hai aaj

subh se saman hain hammam ke

puchhte hain hazrat-e-zahid se rind

daam kya hain jama-e-ehram ke

lab utar aae hain vo tarif par

ham jo aadi ho gae dushnam ke

dava-e-ishq-o-vafa par ye kaha

sab baja lekin mire kis kaam ke

ban-sanvar kar kab bigadta hai banao

subh tak rahte hain jalve shaam ke

jaur se ya lutf se puura kiya

aap pichhe pad gae jis kaam ke

hai gada-e-mai-kada bhi kya haris

bhar liye jholi men tukde jaam ke

naala o fariyad ki taqat kahan

baat karta huun kaleja thaam ke

khugar-e-bedad ko rahat hai maut

bhagta huun naam se aram ke

‘dagh’ ke sab harf likhte hain juda

tukde kar Daale hamare naam ke

More Poems

Leave a Comment