bahut hi saf-o-shaffaf aa gaya taqdir se kaghaz
tumhare vaste laaya huun main kashmir se kaghaz
hua hai abru-e-janan se dil-e-betab sad-para
muqabil ho nahin sakta dam-e-shamshir se kaghaz
agar lohe ke gumbad men rakhenge aqraba un ko
vahin pahunchaega ashiq kisi tadbir se kaghaz
miri qismat likhi jaati thi jis din main agar hota
uda hi leta dast-e-katib-e-taqdir se kaghaz
bhala saada varaq par likhta kya rangin-mizajon ko
munaqqash kar liya tha pahle hi taqdir se kaghaz
kuchh us khushbu ki had bhi hai moattar ho gaya bilkul
mire hathon men vasf-e-gesu-e-shabgir se kaghaz
adu ka khat hai ya taaviz hai jo yuun hai siine par
ye kyuun rakkha gaya hai izzat-o-tauqir se kaghaz
khat-e-taqdir se behtar main samjhun is ko duniya men
tu likhva laae gar qasid but-e-be-pir se kaghaz
bata zalim mire qasid ne tera kya bigada tha
jo le kar phaad daala dast-e-be-taqsir se kaghaz
mire haath aa gaya ‘parvin’ adu ke naam ka khat tha
gira tha rah men jo dast-e-but-e-be-pir se kaghaz
Leave a Reply