Us Samt Mujhko Yar Ne Jaane Nahin Diya

us samt mujh ko yaar ne jaane nahīñ diyā

ik aur shahr-e-yār meñ aane nahīñ diyā

kuchh vaqt chāhte the ki socheñ tire liye

tū ne vo vaqt ham ko zamāne nahīñ diyā

manzil hai us mahak kī kahāñ kis chaman meñ hai

us kā pata safar meñ havā ne nahīñ diyā

rokā anā ne kāvish-e-be-sūd se mujhe

us but ko apnā haal sunāne nahīñ diyā

hai jis ke ba.ad ahd-e-zavāl-āshnā ‘munīr’

itnā kamāl ham ko ḳhudā ne nahīñ diyā

Leave a Comment