hua naqib-e-baharan abhi nahin ai dil
ye rut badalne ka imkan abhi nahin ai dil
firaq-e-naghma se mere hi lab malul nahin
koi parinda ghazal-ḳhvan abhi nahin ai dil
abhi kuchh aur ḳhajil ho rah-e-tamanna par
tu is ke lutf ka unvan abhi nahin ai dil
use bhulane men kuchh vaqt to lagega mujhe
ye kaam itna bhi asan abhi nahin ai dil
tum apni saari kamanden na phenk dena kahin
udhar vo chashm gurezan abhi nahin ai dil
sanvar kuchh aur ki jalva-numa.iyan teri
nigah-e-shauq ke shayan abhi nahin ai dil
charagh-e-ḳhvab ho raushan to koi baat bane
nashat-e-dida-e-hairan abhi nahin ai dil
Leave a Reply