dil ki dahliz talak ḳhud ko rasa.i dega
mira lahja mire sheron men suna.i dega
mera hona hai hua jis ki badaulat mumkin
ab vo chehra miri ankhon men dikha.i dega
main ne ankhon se tujhe duur kiya tha lekin
ye na socha tha ḳhuda aisi juda.i dega
aur zarḳhez karega ye mire lafzon ko
hijr yakta hai to yakta hi kama.i dega
dekh kar dasht ke tevar main yahi sochti huun
ishq abhi aur mujhe abla-pa.i dega
main ne us dil ko dhaḌakne se hai roka varna
tu samajhta hai tujhe koi duha.i dega
Leave a Reply