Zafar Iqbal
kuchh sabab hi na bane baat baḌha dene ka
khel khela hua ye us ko bhula dene ka
apne hi samne divar bana baiTha huun
hai ye anjam use raste se haTa dene ka
yunhi chup chaap guzar ja.iye in galiyon se
yahan kuchh aur hi matlab hai sada dene ka
rasta rokna maqsad nahin kuchh aur hai ye
darmiyan men koi divar uTha dene ka
aane valon ko tariqa mujhe aata hai bahut
jaane valon ke ta.aqub men laga dene ka
ek maqsad to hua DhunDna us ko har-su
lutf hi aur hai paane se ganva dene ka
ik hunar paas tha apne so nahin ab vo bhi
jo dikha.i nahin deta hai dikha dene ka
sab ko malum hai aur hausla rakhta huun abhi
apne likkhe hue ko ḳhud hi miTa dene ka
TuuT paḌti hai qayamat koi pahle hi ‘zafar’
qasd karta huun jo fitne ko jaga dene ka
Leave a Reply