ham jaanā chāhte the jidhar bhī nahīñ ga.e
aur intihā to ye hai ki ghar bhī nahīñ ga.e
vo ḳhvāb jaane kaise ḳharābe meñ gum hue
is paar bhī nahīñ haiñ idhar bhī nahīñ ga.e
sāhib tumheñ ḳhabar hī kahāñ thī ki ham bhī haiñ
vaise to ab bhī haiñ koī mar bhī nahīñ ga.e
bārish huī to hai magar itnī ki ye zarūf
ḳhālī nahīñ rahe haiñ to bhar bhī nahīñ ga.e
‘ādil’ zamīn-e-dil se zamāne ḳhayāl ke
guzre kuchh is tarah ki guzar bhī nahīñ ga.e