Zulfiqar Aadil
ham jaana chahte the jidhar bhi nahin ga.e
aur intiha to ye hai ki ghar bhi nahin ga.e
vo ḳhvab jaane kaise ḳharabe men gum hue
is paar bhi nahin hain idhar bhi nahin ga.e
sahib tumhen ḳhabar hi kahan thi ki ham bhi hain
vaise to ab bhi hain koi mar bhi nahin ga.e
barish hui to hai magar itni ki ye zaruf
ḳhali nahin rahe hain to bhar bhi nahin ga.e
‘adil’ zamin-e-dil se zamane ḳhayal ke
guzre kuchh is tarah ki guzar bhi nahin ga.e
Leave a Reply