har lamha marg-o-zist men paikar dekhna
khinchi hui hai vaqt ne talvar dekhna
is dopahar ki dhuup men saaya kahan mile
din dhal chale to phir kahin divar dekhna
ab to safar ke sakht marahil hain aur ham
jab paas aae manzil-e-dildar dekhna
be-tabiyan hon laakh magar us ke ru-ba-ru
chhoden na haath daman-e-pindar dekhna
ai maslahat ki past zaminon ke basiyo
kitni bulandiyan hain sar-e-dar dekhna
zarra bhi aftab se kamtar nahin yahan
yaaro magar ba-dida-e-bedar dekhna
‘javed’ ham hain aur hai ehsas ka khulus
yaron ke paas jhuut ke tumar dekhna
Leave a Reply