Farhat Shahzad
main apne-ap se barham tha vo ḳhafa mujh se
sukun se kaise guzarta ye rasta mujh se
ghazal suna ke kabhi nazm gunguna ke miri
vo kah raha tha mire dil ka majra mujh se
guzar ke vaqt ne gunga bana diya tha jinhen
vo lafz maang rahe hain na.i sada mujh se
na gul ki koi ḳhabar hai na baat gulshan ki
ḳhafa si lagti hai kuchh roz se saba mujh se
vo jis ne ḳhvab mire pal men qatl kar Daale
ḳhiraj mangne aaya hai ḳhuun ka mujh se
niyaz-mand raha main bhi us ka sab ki tarah
ki koi bhanp na le us ka silsila mujh se
aziiz mujh ko hain tufan sahilon se siva
isi liye hai ḳhafa mera naḳhuda mujh se
na jaane kaun si mahfil men kis ke saath huun main
hai munqat’a mira apna bhi rabta mujh se
bas ek baar nazar bhar ke main ne dekha tha
nazar mila na saka phir vo be-vafa mujh se
Leave a Reply