Munawwar Rana
ye but jo ham ne dobara bana ke rakkha hai
isi ne ham ko tamasha bana ke rakkha hai
vo kis tarah hamen inaam se navazega
vo jis ne hathon ko kaasa bana ke rakkha hai
yahan pe koi bachane tumhen na aaega
samundaron ne jazira bana ke rakkha hai
tamam umr ka hasil hai ye hunar mera
ki main ne shishe ko hiira bana ke rakkha hai
kise kise abhi sajda-guzar hona hai
amir-e-shahr ne khata bana ke rakkha hai
main bach gaya to yaqinan ye moajiza hoga
sabhi ne mujh ko nishana bana ke rakkha hai
koi bata de ye suraj ko ja ke ham ne bhi
shajar ko dhuup men chhata bana ke rakkha hai
Leave a Reply