Poet
umr saari tiri chahat men bitani paḌ jaa.e
ye bhi mumkin hai ki ye aag bujhani paḌ jaa.e
meri is ḳhana-badoshi ka sabab puchhte ho
apni divar agar tum ko girani paḌ jaa.e
mere a.ada se kaho had se tajavuz na karen
ye na ho mujh ko bhi shamshir uThani paḌ jaa.e
kya tamasha ho agar vaqt ke sultan ko bhi
dar-e-insaf ki zanjir hilani paḌ jaa.e
kaash phir mujh se vo puchhen miri vahshat ka sabab
kaash phir mujh ko vo tasvir dikhani paḌ jaa.e
dasht se shahr men kuchh soch ke aana ‘asif’
zindagi bhar ki riyazat pe na paani paḌ jaa.e
Leave a Reply