Umr Sari Teri Chahat Mein Bitani paD Jae

umr saarī tirī chāhat meñ bitānī paḌ jaa.e

ye bhī mumkin hai ki ye aag bujhānī paḌ jaa.e

merī is ḳhāna-badoshī kā sabab pūchhte ho

apnī dīvār agar tum ko girānī paḌ jaa.e

mere a.adā se kaho had se tajāvuz na kareñ

ye na ho mujh ko bhī shamshīr uThānī paḌ jaa.e

kyā tamāshā ho agar vaqt ke sultān ko bhī

dar-e-insāf kī zanjīr hilānī paḌ jaa.e

kaash phir mujh se vo pūchheñ mirī vahshat kā sabab

kaash phir mujh ko vo tasvīr dikhānī paḌ jaa.e

dasht se shahr meñ kuchh soch ke aanā ‘āsif’

zindagī bhar kī riyāzat pe na paanī paḌ jaa.e

Leave a Comment