dil men jinhen utarte dil se vahi utar ga.e
jism ko chumte rahe ruuh pe vaar kar ga.e
phir sar-e-shaḳh-e-arzu khil ke mahak uThi kali
dard ki fasl ho chuki daagh ke din guzar ga.e
saare malamaton ke tiir jin ka hadaf bane the ham
apne liye vo tiir bhi kaam dua ka kar ga.e
aaj to teri yaad bhi marham-e-dil na ho saki
zaḳhm zarur dab ga.e daagh magar ubhar ga.e
dasht-e-tavahhumat men apni sada hai aur ham
husn-e-yaqin ke qafile kis se kahen kidhar ga.e
vaqt ke qafile men jab koi na ham-safar mila
ban ke ghubar-e-rahguzar dasht men ham bikhar ga.e
Leave a Reply