dushman ki taraf ho ke nikalne nahin dete
ham ko vo buri raah bhi chalne nahin dete
ankhen hamen talvon se vo malne nahin dete
ham chutkiyon se dil ko masalne nahin dete
kahte hain mai-e-nab hasinon ka hai joban
ham bazm men apni use Dhalne nahin dete
vo kya lahd-e-ghair ko pamal karenge
chalte hue fiqre bhi to chalne nahin dete
jalta huun bachate hain use soz-e-darun se
dushman ko miri aag men jalne nahin dete
nazuk hai mire nakhl-e-tamanna ki har ik shakh
is khauf se vo phulne-phalne nahin dete
kab bose liye un ke jo bal khaae hain gesu
tum galon ko kyuun zahr ugalne nahin dete
aai hai ye kahti hui kis ki shab-e-furqat
ham rang zamane ko badalne nahin dete
Dar hai na dupatta kahin siine se sarak jaae
pankha bhi hamen paas se jhalne nahin dete
kyuun ham ko jalate ho dam-e-vasl ye kya hai
kyuun phunkte ho shama ko jalne nahin dete
hai jaan miri kashmakash-e-naza men din-rat
arman to kya dam bhi nikalne nahin dete
khulne nahin dete kabhi kam-zarfi vaaiz
ham rind pila kar bhi ubalne nahin dete
jaata huun to aati hai yahi tuur se avaz
ham dekhne valon ko sambhalne nahin dete
kya kaam ‘riyaz’ aane ko sau baar bahar aae
ham ko ye hasin phulne-phalne nahin dete