Girne Ki Tarah Ka Na Sambhalne Ki Tarah Ka

Zafar Iqbal

girne ki tarah ka na sambhalne ki tarah ka

saara vo safar khvab men chalne ki tarah ka

barish ki bahut tez hava men kahin mujh ko

darpesh tha ik marhala jalne ki tarah ka

ik chand ubharne ki tarah ka mire bahar

suraj mire andar koi dhalne ki tarah ka

aisa hai ki rahta hai sada saath bhi us ke

manzar koi poshak badalne ki tarah ka

udti hui si ret vahi dasht men har-su

paani vahi dariya men uchhalne ki tarah ka

kaisi ye khizan chhai hai mujh men ki sarasar

mausam hai vahi phulne phalne ki tarah ka

kya dil ka bharosa hai ki is aab o hava men

vaise hi ye pauda nahin palne ki tarah ka

malum bhi tha mujh ko magar bhuul chuka huun

rasta koi jangal se nikalne ki tarah ka

main to yahi samjha ‘zafar’ is baar bhi shayad

mujh par ye bura vaqt hai talne ki tarah ka