Poet
koi payam-e-musalsal hai shor-e-dariya bhi
tahi-suḳhan se nahin hai sukut-e-sahra bhi
faza-e-dasht men ahl-e-junun ke hangame
hamen to raas na aa.i magar ye duniya bhi
zamin-e-tishna-dahan ki sada to aa.i thi
magar ye baat ki abr-e-bahar barsa bhi
ye bu-e-gul bhi pareshan bahut hui lekin
bahut hua miri avargi ka charcha bhi
kiya hai fat.h koi lamha-e-vafa jab se
miri giraft men imroz bhi hai farda bhi
abhi to tishna-labi ke surur men gum hain
ham ahl-e-zarf karenge kabhi taqaza bhi
jahan ko dekhne vaali hazar ankhen hain
inhin men hogi kahin koi chashm-e-bina bhi
jo be-hunar hain vo sha.ista-e-gunah nahin
gunah karne men ik shart hai saliqa bhi
ajiib alam-e-begangi men aa nikle
garan guzarti hai dil par tiri tamanna bhi
jo mil raha tha ba-zahir baḌe ḳhulus ke saath
janab-e-‘lais’ ne us aadmi ko samjha bhi
Leave a Reply