chehre pe damak uThta hai jab rang-e-haya aur
aise men maza deti hai apni hi ada aur
gar jaan bhi miri jaa.e to banhon men tumhari
dil men koi ḳhvahish hi nahin is ke siva aur
dar chhoḌ ke tera to kahin ja na sakungi
kafir to nahin huun jo bana lungi ḳhuda aur
har chand ki ghayal huun magar saans hai baaqi
jiine ki mujhe dijiye ab koi saza aur
likhne hain mujhe ḳhvab ke pannon pe ujale
ankhon men jala lungi ‘samina’ main diya aur
Leave a Reply