ku-e-haram se nikli hai ku-e-butan ki raah
haa.e kahan pe aa ke mili hai kahan ki raah
sad-asman ba-daman o sad-kahkashan-ba-dosh
bam-e-buland-e-yar tire astan ki raah
mulk-e-adam men qafila-e-ruh ja basa
ham dekhte hi rah ga.e us bad-guman ki raah
luTta raha hai zauq-e-nazar gaam gaam par
ab kya raha hai paas jo ham len vahan ki raah
ai zulf-e-ḳham-ba-ḳham tujhe apna hi vasta
hamvar hone paa.e na umr-e-ravan ki raah
gul-ha-e-rang-rang hain afkar-e-nau-ba-nau
ye rahguzar-e-sher hai kis gulsitan ki raah
‘tahir’ ye manzilen ye maqamat ye haram
allah re ye raah ye ku-e-butan ki raah
Leave a Reply