Poet
ta.abir janti hai sar-e-dar kyon hue
ham ḳhvab dekhne ke gunahgar kyon hue
bazar-e-tota-chashm se lauTo to puchhna
ham be-muravvati ke ḳharidar kyon hue
ham par itaab dhuup ka hai to sabab bhi hai
dasht-e-alam men saya-e-divar kyon hue
ahbab ki hai baat kahen to kise kahen
ham saanp palne ke gunahgar kyon hue
pal bhar hamare ghar men bhi phir ham se puchhna
is kaaT khati qabr se bezar kyon hue
turfa na kyon lahu ka ho behad-o-be-hisab
ham shahar-e-karobar men fankar kyon hue
haan la.eq-e-saza hain ki bazm-e-ghazal men bhi
ham log marsiya ke talabgar kyon hue
Leave a Reply