mil gaya dil nikal gaya matlab
aap ko ab kisi se kiya matlab
husn ka ro.ab zabt ki garmi
dil men ghuT ghuT ke rah gaya matlab
na sahi ishq dukh sahi naseh
tujh ko kya kaam tujh ko kya matlab
muzhda ai dil ki nim-jan huun main
ab to puura hua tira matlab
apne matlab ke ashna ho tum
sach hai tum ko kisi se kya matlab
atish-e-shauq aur bhaḌki hai
munh chhupane ka khul gaya matlab
kuchh hai matlab to dil se matlab hai
matlab-e-dil se un ko kya matlab
un ki baten hain kitni pahlu-dar
sab samajh len juda juda matlab
us ko ghar se nikal kar ḳhush ho
kya ‘hasan’ tha raqib ka matlab
Leave a Reply