Zia Jalandhari
faza.en is qadar be-kal rahi hain
ye ankhen raat bhar jal-thal rahi hain
dabe paanv miri tanha.iyon men
hava.en ḳhvab ban kar chal rahi hain
sahar-dam sohbat-e-rafta ki yaden
mire pahlu men ankhen mal rahi hain
tira gham kakulen khole hue hai
mire siine men shamen Dhal rahi hain
andheron men kami kya hogi lekin
ye sham.en shaam hi se jal rahi hain
‘ziya’ in sa.aton men kho ga.e ham
khuli ankhon se jo ojhal rahi hain
Leave a Reply