soch ke is suune sahra ko jab se tera dhyan mila
ham bhi gautam ban baiThe hain ham ko bhi nirvan mila
ham ne dekha raat thi kaali jis ka koi or na chhor
us ne ruḳh se zulf haTa.i suraj ko samman mila
ḳhud sharma.e sau bal khaa.e dekh ke apna ruup sarup
baat ki baat na samjhe yaaro kaisa hamen nadan mila
ashk bhare hain nain kaTore gham ki lazzat yaar na puchh
ishq-nagar ke mehmanon ki ḳhatir kya jalpan mila
raah ba-zat-e-ḳhud maqsad hai chalte rahna manzil hai
basti basti jangal jangal bhaTke to ye gyaan mila
Leave a Reply