zamin se aage bhala jaana tha kahan main ne
uthae rakkha yunhi sar pe asman main ne
kisi ke hijr men shab se kalam karte hue
diye ki lau ko banaya tha ham-zaban main ne
shajar ko aag kisi aur ne lagai thi
na jaane saans men kyuun bhar liya dhuan main ne
kabhi to aenge us samt se gulab o charagh
ye nahr yuun hi nikali nahin yahan main ne
miri to aankh mira khvab tutne se khuli
na jaane paanv dhara niind men kahan main ne
Leave a Reply