Samina Saqib
justuju se ḳhuda mila ki nahin
tujh pe dar satvan khula ki nahin
kya kaha paanv ghis ga.e tere
soch ne bhi safar kiya ki nahin
teri ḳhatir badan jala baiThe
phir bhi tera diya jala ki nahin
log lakhon parakh liye tum ne
mere jaisa koi mila ki nahin
sab ne puchha to tha mira lekin
zikr us ne mira kiya ki nahin
main jo choTi men gundh laa.i thi
phuul collar pe vo khila ki nahin
tere kahne pe pahna surḳh libas
ab bata mujh pe ye saja ki nahin
ishq sho.ala hai ye jala dega
mera kahna ye sach hua ki nahin
mil na paa.i tujhe ‘samina’ to
zindagi par asar paḌa ki nahin
Leave a Reply