mujhe nahin hai koi vahm apne baare men
bharo na had se ziyada hava ghubare men
tamasha ḳhatm hua dhuup ke madari ka
sunahri saanp chhupe shaam ke piTare men
jise main dekh chuka us ko log kyuun dekhen
na chhoḌi koi bhi baaqi kashish nazare men
vo bolta tha magar lab nahin hilata tha
ishara karta tha jumbish na thi ishare men
tamam log gharon ki chhaton pe aa jaa.en
baḌi kashish hai na.e chand ke nazare men
mile mujhe bhi agar koi shaam fursat ki
main kya huun kaun huun sochunga apne baare men
purani samt muḌega na koi bhi ‘sajid’
ye ahd-e-nau na bahega qadim dhare men
Leave a Reply