Urooj Zaidi Badayuni
ishq ke hathon men parcham ke siva kuchh bhi nahin
us ka aalam tere aalam ke siva kuchh bhi nahin
be-yaqini su-e-zan iman-e-naqis ki dalil
fikr-e-rahat ḳhatra-e-gham ke siva kuchh bhi nahin
ham se puchho ham bata.en ghayat-e-kaun-o-makan
kargah-e-ibn-e-adam ke siva kuchh bhi nahin
atish-e-nafrat se ab duniya hai aise moḌ par
dida-var go ye jahannam ke siva kuchh bhi nahin
yad-e-ayyame ki ye bhi jan-e-razm-o-bazm the
jin ke paas ab chashm-e-pur-nam ke siva kuchh bhi nahin
ham nahin minjumla ahl-e-raza kyuun kar kahen
jin ke lab par qissa-e-gham ke siva kuchh bhi nahin
ahl-e-duniya ke liye jo abr-e-naisan tha ‘uruj’
ab vo insan ashk-e-shabnam ke siva kuchh bhi nahin
Leave a Reply