ham-rahi ki baat mat kar imtihan ho ja.ega
ham subuk ho ja.enge tujh ko giran ho ja.ega
jab bahar aa kar guzar ja.egi ai sarv-e-bahar
ek rang apna bhi paivand-e-ḳhizan ho ja.ega
sa.at-e-tark-e-ta.alluq bhi qarib aa hi ga.i
kya ye apna sab ta.alluq ra.egan ho ja.ega
ye hava saare charaghon ko uḌa le ja.egi
raat Dhalne tak yahan sab kuchh dhuan ho ja.ega
shaḳh-e-dil phir se hari hone lagi dekho ‘nasir’
aisa lagta hai kisi ka ashiyan ho ja.ega
Leave a Reply