allama-iqbal

Farman-E-Khuda

uttho miri duniya ke gharibon ko jaga do

kakh-e-umra ke dar o divar hila do

garmao ghulamon ka lahu soz-e-yaqin se

kunjishk-e-faromaya ko shahin se lada do

sulatani-e-jamhur ka aata hai zamana

jo naqsh-e-kuhan tum ko nazar aae mita do

jis khet se dahqan ko mayassar nahin rozi

us khet ke har khosha-e-gandum ko jala do

kyuun khaliq o makhluq men haail rahen parde

piran-e-kalisa ko kalisa se utha do

haq ra ba-sajude sanaman ra ba-tavafe

behtar hai charagh-e-haram-o-dair bujha do

main na-khush o be-zar huun marmar ki silon se

mere liye mitti ka haram aur bana do

tahzib-e-navi kargah-e-shishagaran hai

adab-e-junun shair-e-mashriq ko sikha do

More Poems

Leave a Comment