kabhi khandan kabhi giryan kabhi raqsa chaliye
duur tak saath tire umr-e-gurezan chaliye
rasm-e-derina-e-alam ko badalne ke liye
rasm-e-derina-e-alam se gurezan chaliye
asmanon se barasta hai andhera kaisa
apni palkon pe liye jashn-e-charaghan chaliye
shola-e-jan ko hava deti hai khud bad-e-sumum
shola-e-jan ki tarah chak-gareban chaliye
aql ke nuur se dil kijiye apna raushan
dil ki rahon se su-e-manzil-e-insan chaliye
gham nai subh ke taare ka bahut hai lekin
le ke ab parcham-e-khurshid-e-darakhshan chaliye
sar-ba-kaf chalne ki aadat men na farq aa jaae
kucha-e-dar men sar-mast-o-ghazal-khvan chaliye
Leave a Reply