Baadal Ki Tarah Ranj-Fishani Karen Hum Bhi

bādal kī tarah rañj-fishānī kareñ ham bhī

shāyad kabhī is aag ko paanī kareñ ham bhī

ab silsila-e-qissa-e-shab TuuT rahā hai

ab izn atā ho to kahānī kareñ ham bhī

ham ko bhī kabhī dekh havāoñ ke safar meñ

sahrā kī tarah naql-e-makānī kareñ ham bhī

aisā hai ki sikkoñ kī tarah mulk-e-suḳhan meñ

jaarī koī ik yaad purānī kareñ ham bhī

is lamha-e-ruḳhsat ke dhaḌak uThne se pahle

Thahre hue dil tujh ko nishānī kareñ ham bhī

Leave a Comment