dil dasht ki surat tha samundar hua kaise
sarsabz ḳhizan-zad muqaddar hua kaise
chhanv men Dhala kaise tamazat bhara mausam
phulon se bhi nazuk mira paikar hua kaise
phirti thi tamannaon bhari shaal lapeTe
phir jazba-e-gumnam ujagar hua kaise
muddat se ye uljhi hui gutthi nahin suljhi
vo mujh men samaya tha to be-ghar hua kaise
ik umr kisi pal jo mire haath na aaya
vo ḳhvab sa ehsas musaḳhḳhar hua kaise
ik raaz jo hamraz raha barson ‘samina’
ab sochti huun faash jahan par hua kaise
Leave a Reply