Mahmood Sarosh
is mausam ke phal kaḌve hain phulon men bhi rang nahin
taa.ir hain muhtaj-e-nasheman naghmon men ahang nahin
us ke fitnon ki sarkubi sulh se pahle vajib hai
ghair ki paida karda shorish hai aapas ki jang nahin
teghon ki jhankar men bhi ik vajd-avar kaifiyat hai
ruuh ko jaulan karne vaale sirf rabab-o-chang nahin
fa.eda is men jo ho kisi ka apna ḳhuun sajal kar den
jaan chura.en marne se ham aise bhi dil tang nahin
ahl-e-junun ke sab dushman hain divanon se kah dijiye
un se bhi hoshyar rahen vo jin hathon men sang nahin
Leave a Reply