dil ki mire bisat kya ek diya bujha hua
tum ne ise baja kaha ek diya bujha hua
sar pe musallat ki ga.iin saare jahan ki zulmaten
aur mujhe de diya gaya ek diya bujha hua
ham ne to gul kiye the ḳhud apni ummid ke charagh
aap ne kyuun jala diya ek diya bujha hua
dil se na mere puchhiye alam-e-tark-e-arzu
taaq men jis ke rah gaya ek diya bujha hua
a.ina-e-vajud men ḳhud ko jo dekhne gaya
mera hi aks ban gaya ek diya bujha hua
jab yake-ba.ad-digre saare charagh bujh ga.e
aap hi aap jal uTha ek diya bujha hua
aap ki kya misal duun aap to be-misal hain
aur miri misal kya ek diya bujha hua
main ne to us ko baḳhsh di qalb-o-nazar ki raushni
us ne ḳhayal ko diya ek diya bujha hua
ishq men ḳhaak ho ke bhi ‘aḳhgar’ ik aag si rahi
mujh men ba-har-nafas jala ek diya bujha hua
Leave a Reply