chaunk uThe aql vaale ye kya kah diya
husn ko main ne apna ḳhuda kah diya
nur-e-dil se hai raushan jahan-e-vafa
dil ko main ne charagh-e-vafa kah diya
phuul muska.e kaliyon ne angḌa.i li
ai nasim-e-sahar tu ne kya kah diya
main ne dil men koi baat rakkhi nahin
main ne har baat ko barmala kah diya
meri rudad-e-gham kha ga.i hai mujhe
sunne valon ne to vah-va kah diya
log le ja.enge su-e-dar-o-rasan
ham ne dil ka agar mudda.a kah diya
apna sheva raha ‘raje’ kya sadgi
ham ne un ki jafa ko vafa kah diya
Leave a Reply