bahadur-shah-zafar

Rukh Jo Zer-E-Sumbul-E-Pur-Pech-O-Tab Aa Jaega

rukh jo zer-e-sumbul-e-pur-pech-o-tab aa jaega

phir ke burj-e-sumbule men aftab aa jaega

tera ehsan hoga qasid gar shitab aa jaega

sabr mujh ko dekh kar khat ka javab aa jaega

ho na betab itna gar us ka itaab aa jaega

tu ghazab men ai dil-e-khana-kharab aa jaega

is qadar rona nahin behtar bas ab ashkon ko rok

varna tufan dekh ai chashm-e-pur-ab aa jaega

pesh hovega agar tere gunahon ka hisab

tang zalim arsa-e-roz-e-hisab aa jaega

dekh kar dast-e-sitam men teri tegh-e-abdar

mere har zakhm-e-jigar ke munh men aab aa jaega

apni chashm-e-mast ki gardish na ai saaqi dikha

dekh chakkar men abhi jam-e-sharab aa jaega

khuub hoga haan jo siine se nikal jaega tu

chain mujh ko ai dil-e-pur-iztirab aa jaega

ai ‘zafar’ uth jaega jab parda-e-sharm-o-hijab

samne vo yaar mere be-hijab aa jaega

More Poems

Leave a Comment